5 ka brgy humok modahili ang yuta

CEBU, Philippines - Nakig-alayon ang Department of Environment and Natural Resources (DENR)7 sa mga opisyales sa lima ka barangay nga daling maapektohan sa pagdahili sa yuta.

Kini ilang gihimo tungod sa tinguha nga kahatagan sila og kaalam kabahin sa ilang posibleng buhaton sa panahon nga moabot ang mga katalagman.

Matud pa ni Al Emil G. Berador, chief geologist sa DENR 7 nga ang mga barangay kung diin daling maapektahan sa landslides mao ang Barangay Sirao, Malubog , Binaliw ug kasilinganang mga barangay niini.

Dugang pa niya nga nag-umol na sila og ebalwasyon niining maong barangay ug ilang nasuta nga peligro gayud kini sa landslide hinungdan nga ilang gipahibawo ang matag kapitan sa maong mga   barangay kalabot niini aron makahimo dayon sila og tukmang lakang.

Ang geohazard map nga gihimo sa Mines ug Geosciences Bureau adunay impormasyon bahin sa mga lugar nga daling maigo sa baha ug landslide lakip na niadtong mga lugar nga posibleng pabakwitan sa katawhan sa panahon sa katalagman.

Si Berador usab miingon nga nagkataas na ang insidente sa pagdahili sa yuta partikular na sa bukirang bahin sa barangay maoy hinungdan nga gidid-an gayud ang katawhan sa pagtukod og balay sa maong mga lugar aron mahilayo sa peligro ang ilang kinabuhi. (BANATNEWS)