CEBU, Philippines - Aron sa pagsiguro sa kahimtang sa seguridad sa tibuok lalawigan sa Sugbo batok sa hulga sa mga New People’s Army (NPA), ang kapolisan ug mga kasundalohan labing mipalig-on sa ilang pagpangandam sa ilang depensa.
Matud pa ni Police Sr. Supt. Patrocinio Comendador Jr., ang director sa Cebu Provincial Police Office (CPPO) nga nakadawat sila og report nga may mga armadong mga tawo nga nasigpatan sa mga bukirang bahin sa lungsod sa Badian nga gituohang mga sakop sa NPA.
Apan iyang gitataw nga ang iyang buhatan mipadala na og mga kapolisan sa nahisgutang lugar aron pagsuta sa maong taho.
Matud pa ni Comendador nga gawas sa mga polis, ang Armed Forces of the Philippines (AFP) mipadala na usab og mga sundalo didto aron sa pagpahigayon og roving patrol sa maong lungsod ug kasikbit nga mga lugar niini.
Apan gitataw ni Comendador nga negatibo ang tanan busa dili angayang mabalaka ang mga Sugboanon sa maong report.
Apan bisan pa niini, kanunay nga alerto ang kapolisan ug militar ug andam kining mopakgang sa mga rebelde nga naglaraw na usab nga molusad og kasamok dinhi sa lalawigan.
Sa pagpakita nga lig-on ang maong pangandam, gibutyag ni Comendador nga gilusad karon sa kapolisan ug kasundalohan ang joint check points sa mga kadalanan sa lalawigan samtang ang matag police station mopahigayon og Camp Defense Plan Drill. - (BANAT NEWS)