UC nahukman nga Best Debating Team

CEBU, Philippines - Nahimong Best Debating Team ang University of Cebu (UC) debating team human kini modaug sa lantugi batok  Cebu Institue of Technology(CIT) debating team   didto atubangan sa Mandaue City hall ground sa dakbayan sa Mandaue.

Ang UC debating nga gilangkoban nila ni Edison Rey Batiquin, Norberto Ryan Secretarya, Joel E. Asuncion ug Alnajar L. Abdul Kadil, maoy mibarug nga negatibo sa tema nga “Angayan Bang Wagtangon ang Sanguniang Kabataan”.

Sa baruganan sa CIT debating team nga kinahanglang mawagtang ang SK kay mahimo ra mang dad-on   sa lokal nga mga opisyal sa barangay ang katungdanan niini, gisupak kini sa grupo sa negatibo.

Si Batiquin kinsa maoy presidente sa Sugbuanong Kumentaristang Nagpakabana (SUKNA) nagkanayon   nga mahinungdanon ang SK tungod kay moumol kini sa mga batan-on aron mahimong mapuslanong lider ugma damlag.

Sa daghan pang mga ebidensya nga giplastar nila ni Batiquin ug kaubanan kalabot sa kamahinungdanon sa SK, nahukman sa mga huwes sa maong lantugi nga best debater ang UC debating team.

Ang maong debati nahimo pinaagi sa pagpasiugda sa Bombo Radyo Philippines sa ilang tulomanon Lantugi sa Bombo Radyo.

Sayo niini si Juril Patiño, ang manager sa Bombo Radyo mibutyag nga ilang gipasiugdahan ang maong tulomanon aron mabansay pag-ayo ang mga batan-on karon sa paggamit sa pinulongang Sinugboanon nga hapit na makalimti sa daghang mga kabataan.

Kay sa maong tulumanon higpit nga gipatuman ang paggamit og pinulongang Sinugboanon sa lantugi. - (BANAT NEWS)