CEBU, Philippines - Dili pa makadawat og financial assistance karong tuiga ang mga barangay sa Siyudad sa Sugbo nga wala pa maka-liquidate sa nadawat nilang hinabang niadtong 2009 hangtud sa 2010.
Suma pa ni Konsehal Joey Daluz nga kinahanglan nga maka-liquidate una ang mga barangay sa nangagi nila nga mga proyekto aron tulin ug hapsay unya ang ilang pag-apod-apod sa mga hinabang sa barangay karong tuiga.
Mao kini ang rason kun nganong dili uyon si Daluz sa sugyot sa iyang mga kaubanan nga konsehal kinsa gustong usahon ra ang schedule sa pagpang-apod-apod sa hinabang salapi ngadto sa nagkadaiyang barangay.
Si Daluz kinsa kaalyado ni Mayor Michael Rama hugot nga misupak sa baruganan sa mayoridad kinsa dili na niya kaalyado nga gustong dunganon sa tanang barangay ang pagdawat sa financial aid.
Si Mayor Rama miingon nga siya maoy may prerogative kung unsang mga barangaya ang unang hatagan og prayoridad.
Gipasalig hinuon sa mayor nga wala niya panumbalinga ang politika, busa lakip sa mahatagan og proyekto mao kadtong mga lugar nga gidumala sa mga kapitan nga dili niya kaalyado. - (BANAT NEWS)