Naalaan Gisignit Gibiyaan

CEBU, Philippines - Usa ka sakop sa Alpha Kappa Rho ang napalgang gigapos ug gibiyaan sa kasagbutan sa sitio Bakhaw, barangay Catmon Daan sa lungsod sa Catmon pasado alas-7 sa buntag niadtong Sabado.

Ang biktima nailhan nga si Roger Beltran, 25, lumad nga molupyo sa Bagatayang sa lungsod sa Sogod ug kasamtangan nang nagpuyo sa barangay Pardo syudad sa Sugbo.

Sa pakighinabi sa Banat News ni SPO1 Januario Sudaria sa Catmon Police Station, usa ka manananggot nga si Floriano Juban maoy nakakita sa biktima nga gigapos ang mga kamot og pisi ug gibaatan og packaging tape ang baba.

Dihang iyang giduol buhi pa kini hinungdan nga iyang gitawgan ang kapolisan.

Saysay pa sa biktima nga niadtong Biyernes sa gabii nagbisekleta siya pauli sa ilang balay sa Pardo subay sa N.Bacalso Avenue dihang kalit siyang gihunongan og multicab ug usa ka lalaki ang mihapak og puloan sa armas sa iyang ulo ug pugsanong mipasakay kaniya sa maong sakyanan.

Diha sa sulod matud pa usa ka babaye ang giingong migapos sa iyang mga tiil ug kamot gamit ang pisi ug gibutangan og tape ang iyang baba samtang ang ubang sakay misikadsikad kaniya hangtud nga siya nakuyapan.

Sa iyang pagmata gibinaklid na siya ug gibiyaan sa maong kasagbutan sa Catmon. Matud pa ni Sudaria ang biktima miangkong sakop sa Akhro apan dili na kini aktibo pa sa maong grupo.

Dugang pa niini nga dunay nadunggan ang biktima sa usa sa mga misignit kaniya nga miingon “Uy! Dili man ni mao!”

Gisubay pa karun sa kapolisan sa lungsod sa Catmon ang tanang alegasyon sa biktima ug kun si kinsa ang mga mikuha kaniya.

Lakip usab niini, gisubay usab sa kapolisan kun aduna bay posibling nakakita sa paglabay sa biktima sa nahisgutang lugar. - (BANAT NEWS)