Industriya sa mangga nagsukarap

CEBU, Philippines - Gawas kun may aksyon ang kagamhanan, ang pagsukarap sa industriya sa mangga sa nasud peligrong mahapay sa dayon, sumala ni Virgie dela Fuente, ang Presidente sa Philippine Mango Industry (PMI).

Matud pa ni dela Fuente nga nagkadyutay na ang mga punoan sa mangga sa nasud karon tungod kay wala kaayo magpakabana ang mga mag-uuma sa kamahinungdanon niining maong industriya.

Napanid-an sa kadagkoan sa PMI nga kasagaran sa mga may manggahan, ilang ipiyal og mga kontraktor ang pagpabunga ug pag-ani sa ilang mangga, busa gamay nalang sila og kitaon isip mga tag-iya.

Gumikan niini kasagaran sa mga mag-uuma mawad-an og gana sa paggam sa ilang mga tanom nga mangga tungod kay sa kadako unta sa kitaon  sa bunga niini, gamay nalang ang ilang bahin tungod kay tua man ang dakong pahat sa mga tawo nga gikontrata nila nga maoy mopabuwak, mopabunga, moputos ug mo-ani niini. Kining tanan naggumikan sa kakuwang og kaalam sa mga mag-uuma bahin sa maayong pag-atiman aron mohatag og maayong bunga ang ilang mangga.

Matud pa ni dela Fuente nga dako kaayo og kaakohan ang Department of Interior and Local Government (DILG) aron padasigon nila ang mga may manggahan sa ilang tagsa-tagsa ka lokalidad nga magtuon bahin sa paggam sa mangga.

Miingon si dela Fuente nga ang Department of Agriculture (DA) andam nga mopasiugda og seminar bahin sa pag-atiman sa mangga ug mopautang usab og puhonan, aron masalbar ang maong industriya. Ang mga mag-uuma nga nawad-an og kadasig sa pag-atiman sa ilang mangga miunay pagpuril niini aron himoong uling.

Gumikan niini si dela Fuente miingon nga   niadtong 2010 nakatumod ang nasud og 71,000 metriko toniladas ngadto sa gawas apan mikibra kini sa tuig 2011 ngadto sa P70,000 metriko toniladas nalang ug matag tuig nag-anam kini og kibra.

Ang labing daghang produkto nga magga sa nasud naggikan sa Pangasinan, samtang ang labing lami nga mangga sa tibuok kalibotan naggikan sa Cebu nga mao ang mangga carabao. (BANATNEWS)