Minibus misampak sa paril 7 angol

CEBU, Philippines - Pito ang naangol human madasmag sa kongkretong paril ang usa ka minibus nga misimang sa national highway sa North Poblacion lungsod sa San Fernando niadtong Biyernes sa alas 4:30 sa hapon.

Ang nakasugat og aksidente mao ang Justin minibus nga dunay rota nga Carcar-Cebu nga gipanag-iya ni Jose Castañares ug gimaneho ni Eliezer Cansiran, 30, taga Bairan sa siyudad sa Naga.

Ang mga naangol nga pasahero mao sila si Semilen Pepito, 26, Lorena Sabala, 38, Adila Barritua, 56, Jovilyn Bulawan, 23, Jake Lasaga, 22, Charles Anales, 26, pulos taga siyudad sa Carcar ug Cardian Ybañez,16 , nga taga Pahina Central sa siyudad sa Sugbo.

Matud ni PO3 Julius Cesar Parages sa San Fernando Police dihang nahinabi sa Banat News ang maong sakyanan paingon sa siyudad sa Sugbo apan pag-abot   sa maong lugar nasampak kini sa paril. Atol sa pagsukitsukit sa drayber kini mibutyag nga na-atrasaho na kini paghunong tungod sa kalit nga pagmenor sa gisundan niining sakyanan maong iyaha nalang unta kining gilikayan apan nalahos hinuon sila sa maong paril.

Wala hinuoy nasakitan sa tagbalay nga nanag-iya sa maong paril nga pamilyang Samuel Saberon apan nangaangol tungod sa bun-og, pangos, samad sa ulo ug kalawasan ang pasahero ni Cansiran ug nangalandig sa tambalanan.

Ang drayber kasamtangang gitanggong sa karsel sa kapulisan samtang gipahigayun pa ang subsub nga pakisusi. (BANATNEWS)