Na-heat stroke patay

CEBU, Philippines - Patay ang usa ka 50-anyos nga lolo nga gidudahang na-heat stroke samtang nanginhas sa hunasan sa kadagatan sa barangay Sambag sa siyudad sa Bogo sa nilabay’ng adlaw.

Ang napalgang patay nga naglutaw na sa dagat mao si Gerardo Acilllo, 50, nagpuyo sa maong lugar.

Matud ni PO3 Allan Dosdos, imbestigador sa Bogo City Police dihang nahinabi sa Banat News subay sa inisyal nga imbestigasyon milakaw nianang pagkahapon si Acillo aron manginhas.

Ang anak niini nga si Jeffrey Acillo, 25, mibutyag nga nananghid ang ilang amahan nga manginhas apan wala sila magdahom nga mao kini dangatan.

Atol sa maong adlaw naglagiting ang kainit sa klima bisan paman sa panagsang pagtulo sa uwan sa pipila ka bahin sa tibuok nasud.

Ang anak ni Acillo kinsa misubay sa amahan nianang pagkahapon na nakugang nalang pagkakita niini nga naglutaw na sa mabaw kaayong bahin sa dagat ug wala na maglihok.

Daling gidala sa Verallo District Hospital si Acillo apan gideklarar sa mga doktor nga dead on arrival (DOA).

Nagduda ang mga kabanay nga gi-atake ang biktima o ba kaha na heat stroke ug natumba ug nalumos patay, gikatakdang ipaawtopsiya ang patay’ng lawas kung may pagtugot sa kabanay niini.

Ang mga tinugyanan sa panglawas daan nang mipasidaan sa publiko nga magmatngon tungod sa kainit sa panahon karon nga posibleng makaingon sa heat stroke nga mahimong ikamatay sa tawo.

Ang heat stroke sagad mahitabo kun masobrahan og kabuwad sa init ug kulang sa tubig o likido nga giinom ang usa ka tawo. Sumala pa sa mga doktor mahimo usab kining makakomplikar sa daan nang mga balatian. (EIM)    (BANATNEWS)