Pista sa argao usa patay

CEBU, Philippines - Patay ang usa ka mag-uuma human kini gidunggab sa laing mag-uuma atol sa ilang pagsugal og hantak nunot sa kasaulogan sa pista sa bukirang bahin sa sitio Tabon sa barangay Langub lungsod sa Argao niadtong Huwebes sa alas 3:45 sa hapon.

Ang biktima mao si Edgar Embudo, nagpuyo sa maong lugar samtang ang suspek mao si Alejandro Albaraccin, 46, nagpuyo sa sitio Kabulihan sa barangay Colawin, Argao.

Matud ni PO2 Manuelito Abrenica Jr., desk officer sa Argao Police Station dihang nahinabi sa Banat News pildero na og dako ang suspek ug naluoy ang biktima hinungdan nga iyaha kining gibadlong nga paundangon na.

Apan inay mopatuo nasuko na hinuon ang suspek ug mibunot og kutsilyo dayong hansak niini ngadto sa biktima nga diha ra sa iyang tupad ug naigo sa dughan ug walang bukton.

Ang mga kaubang sugarol diha sa hantakan mao nay nitabang sa biktima ug gihatod kini sa Isidro Kintanar Memorial Hospital apan gideklarar nga dead on arrival (DOA).

Samtang ang suspek nagpahatod usab dayun kini og motor paingon sa buhatan sa kapulisan ug mitahan sa iyang kaugalingon.(/EIM) (BANATNEWS)