4 gipamusil naangol

CEBU, Philippines - Upat ka lalaki ang nangaangol sa nahitabong managlahing pagpamusil sa dakbayan sa Sugbo kagahapon sa kaadlawon ug sa milabay’ng gabii.

Ang unang insidente nahitabo sa F. Jaca Street , corner White Rd. alas 12:45 sa kaadlawon diin duha ka managsuon ang gipangrakrakan sa duha ka wala mailhing mga lalaki.

Nalandig sa Cebu City Medical Center ang magsuong sila si Gerardo Ricablanca, 40- anyos, molupyo sa sitio San Vicente, White Rd., barangay Inayawan ug usa ka jeepney drayber ug si Pastor, 38, ug trainee sa Citizens Armed Forces Geophysical Unit (CAFGU).

Si Insp. Eugene Raganas, Pardo Police Station Chief sa Cebu City Police Office mibutyag sa Banat News nga naabtan ni Gerardo si Pastor nga nakiglalis sa duha ka lalaki diha sa dalan Greenfield ug kalit nga gipusil ang manghod niini.

Dihang nakapaduol si Gerardo siya na usab ang gipusil ug naigo siya sa kamot ug paa samtang nakaangkon og samad pinusilan sa lawas si Pastor.

Nakaipsot usab dayon ang mga mamumuno.

Sa laing insidente, duha ka 20- anyos nga lalaking nagbisekleta ang gipusil sa sitio Kalinaw, sa barangay Carreta sa alas-10 sa gabii nga giilang sila si Jeffrey Villanueva ug Heracleo Manatad.

Usa ka lalaking naila lang sa pangalan nga “Marjun” maoy gitumbok sa duha nga mipusil kanila dihang wala nila kini tagda sa pagsampit niini kanila. Nasuta usab nga adunay atraso ang suspek ug ang mga biktima kaniadto.  (BANATNEWS)