Rama mokiha kang Osmeña

CEBU, Philippines - Daw gihalangan na si Mayor Michael Rama sa mga pamahayag nga gibuhian sa numero uno niyang karibal karon sa politika nga si Kong. Tomas Osmeña.

Si Rama mibutyag sa mga tigbalita nga gitun-an na sa ilang legal counsel ang mga mensahe ni Osmeña batok kaniya sa miaging adlaw dungan sa isyu sa demolisyon diha sa Barangay Apas niining siyudad sa Sugbo.

Matud pa ni Rama nga kung masuta niya nga “libelous” ang gipanabi ni Osmeña posibleng iyaha kining pasakaan og kaso.

Si Rama wala mahimuot sa gisulti ni Osmeña nga matud pa nga “showbiz” ang iyang aksyon sa dihang mitabang kini sa mga residente sa maong dapit nga masuspenso ang demolisyon.

Matud pa ni Rama nga nagtinarong siya sa iyang trabaho sanglit iyaha man kini nga responsibilidad isip mayor sa siyudad nga tabangan ang iyang mga konstituwente.

Gihulagway ni Rama si Osmeña nga iresponsable mohatag og komento ug iyaha kini nga giawhag nga dili magpataka og sulti. Nagkanayon ang mayor nga makadaghan na siya makasuway nga mopakalma og tensyonadong demolisyon.

Matud pa ni Rama nga dili lalim nga mawagtangan og balay busa motabang gyud siya og hangyo kutob sa iyang mahimo. (/EIM) (BANATNEWS)