Laing anggulo gisubay sa ambush

CEBU, Philippines - Kompetensya sa supplier sa drugas ug ingon man illegal gambling maoy mga dagkong anggulo nga gisubay karon sa imbestigasyon sa kapulisan sa dakbayan sa Sugbu sa nagpadayong imbestigasyon sa pagpusil patay kang Antonio Santos, 39, niadtong Miyerkules sa hapon sulod sa iyang sakyanan diha sa Unit 5 Opra sa barangay Kalunasan ning dakbayan sa Sugbu.

Si Sr. Supt. Melvin Ramon Buenafe, hepe sa Cebu City Police Office (CCPO) sa press conference kagahapon nagkanayon nga wala pa hinuon nila masuta kun unsa kadako ang operasyon sa drugas ug illegal gambling nga gikalambigitan sa biktima.

Nadismaya og dako ang mga imbestigador tungod kay ang katapusang tawong gikaestorya ni delos Santos nga si Ariel Degamo alyas ‘Doroteo Imperial’ nga anaa karun sa Cebu City Jail tungod sa kasong robbery with homicide, murder ug homicide dili gustong mokooperar kanila.

“Nihangyo ang complainants ipalayo siya sa Gingoog City kay impluwensyado kuno unya mangahadlok sila,” sumala pa ni Buenafe.

Gidugang ni Buenafe nga klaro kaayong suod nga managhigala si Degamo ug ang biktima sanglit kanunay kining mobisita sa CCJ.

Apan wala niini gisalikway nga posibling kauban sa grupo sila si Imperial ug Santos sa ilang illegal nga kalihokan ug ang pagbisita sa naulahi posibleng labot kini sa ilang negosyo ug posibleng may kalambigitan sa motibo.

Nakuhaan og P73 mil ang biktima sa iyang posesyon, apan matud ni Buenafe nga ila pa kining establisahon pag-ayo kun sa biktima ba ang kuwarta o kaha gihatag lang kaniya sa tawong misakay kaniya ug mao usab ang mipusil kaniya.

Si Degamo maoy giila sa kapulisan nga lider sa tulisan didto sa Mindanao ug maoy katapusang gibisita ni Santos diha sa City Jail sa wala pa siya pusila sa usa ka lalaki nga sakay ra usab sa iyang sakyanan niadtong Miyerkules.

Matud ni Buenafe nga kining wala pagkooperar kanila ni Degamo posibling duna kini gitagoan nga sekreto o kaha ang number sa cellphone nga ilang nakuha gikan sa biktima posibleng kang Degamo nga dunay pipila ka mga mensahe.

“Posible ka grupo ni sila si Santos. Posibleng duna silay transaksyon sa drugs,” maoy pagduda ni Buenafe.

Wala pa hinuon mokompirmar si Buenafe kung ang pagpusil patay ni Santos may koneksyon sa pagtulis sa APL Logistics sa dakbayan sa Mandaue sa samang adlaw niadtong Miyerkules sa buntag

Kagahapon sa buntag mipatawag og case conference si Buenafe sa mga hepe sa City Intelligence Branch (CIB), Investigation and Detective Management Branch (IDMB), Police station 9 ug Homicide Section aron usahon ang ilang mga lakang. (BANATNEWS)