CEBU, Philippines - Usa ka hubog nga Libyan ang nasikop tungod sa pagpang-harass sa usa ka maanyag nga babaye sa usa ka sikat nga imnanan sa General Maxilom Avenue, dakbayan sa Sugbu kagahapon sa kaadlawon.
Ang suspek giila nga si Ahmed Geryani, 23, estudyante ug nagpuyo sa dakbayan sa Mandaue ug nagkuha og kursong AB English sa usa sa mga unibersidad dinhi sa Sugbu samtang ang biktima mihangyo nga di lang magpaila.
Gibutyag sa 24-anyos nga biktima nga naglingaw lingaw kini kuyog ang iyang mga barkada sa may Juliana’s dihang giduol sila sa duha ka Koreano nga nakighigala kanila apan ilaha kining gibalibaran.
Dangtan pila ka minutos miduol si Geryani ug mikumbinsir sa dalaga nga makig-inom apan gibalibaran gihapon niya kini.
Sa dugay nilang panag-estoryahay matud pa kalit siyang giingnan ni Geryani og “you’re ugly” ug gidukol siya sa agtang ug gipatiran ang bangko nga nakaigo sa biktima hinungdan nga misukol ang naulahi.
Tungod sa kagubot nakaeskapo ang Libyan apan nakit-an gihapon sa mga polis nga miresponde tungod kay wala kini masuhito sa lugar. Ang suspek pasakaan og kasong kalapasan sa Republic Act 9262 o Violence Against Women. (/EIM) (BANAT NEWS)