CPDRC di na manawat og bilanggo

CEBU, Philippines - Tungod sa nagkadaghang inmates nga gisulod sa Cebu Provincial Detention and Rehabilitation Center (CPDRC) dunay plano karon ang Kapitolyo nga dili na una manawat og mga piniriso kun nagpadayon pa ang hearing sa mga kaso sa inmate diha sa korte.

Kini maoy gibutyag ni Atty. Jose Ma. Gastardo, Capitol Consultant on Planning and Development and Jail Matters sa diha nga nahinabi sa Banat News.

Matud pa ni Gastardo nga aduna silay 1,658 ka mga inmates nga nabilanggo karon sa CPDRC ug gihulagway nga overcrowded na tungod kay ang kapasidad niini 1,200 ra ka tawo. Niadtong milabay’ng Semana Santa mipadala sila og 30 kombiktado sa National Bilibid Prisons sa Muntinlupa, dugang kapin napulo pa ang gikatakdang ipadala didto.

Dugang pa ni Gastardo nga ila nang gipahibalo ang mga hepe sa kada police station sa lungsod nga dili na sila manawat pa og piniriso nga wala pa makombikto sa kaso.

“ We have already informed all chiefs of police sa kada lungsod nga we will no longer be accepting inmates nga naay on going hearing kay overpopulated na,” pasabot pa ni Gastardo. Sa laing bahin, gipadayag usab ni Gastardo nga nagpaabot nalang sila sa desisyon sa korte kalabot sa ilang gisang-at nga mosyon nga mabalhin si Mayor Alfredo Arcenio sa Bureau of Jail Management and Penology (BJMP).

Kini human usab sa sunod-sunod nga gihulagway nga pagpabuyag ni Arsenio sa CPDRC nga maoy hinungdan sa pagkatangtang sa jail warden ug pagkakaso sa usa ka gwardiya. (BANAT NEWS)