Ex-Army ang usa sa mitulis sa APL

CEBU, Philippines - Usa sa lima ka suspek sa pagpanulis sa APL Logistics Ltd. and APL Logistic Phils. Inc. niadtong Lunes ang nailhan na sa mga kapolisan sa City Investigation Branch (CIB) sa Cebu City Police Office (CCPO) kagahapon.

Ang suspek si Reynante Roquero alyas Yukyok, usa ka kanhi sakop sa Philippine Army kini human nakita sa CCTV camera sa maong establisamento, diin nagsuot kini og puti nga sinina nga naay tatak nga Fubu ug back pack nga itom. Lakip sa nailhan mao si Rudolfo Mondares Claudio alyas Castillo Ompong , ang duha giingong konektado sa grupo ni Jun Cabando kinsa una nang misuway pagpanulis dinhi apan napusilan ug napatyan og duha ka kauban sa nakalabay’ng tuig.

Gibutyag ni CIB Chief Inspector Romeo Santander nga planado kaayo sa grupo ang ilang pagpanulis sa maong tindahan base sa gipakita nilang labok.

Matud pa ni Santander nakig-alayon na sila sa ubang police units aron mapanid-an ug makakuha og dugang impormasyon bahin sa grupo ilabi na dinhi sa Rehiyon 7.

Dugang pa ni Santander nga ang mga suspek gikan sa Mindanao ug maayo ang pagkaplano nila.

Dako ang posibilidad nga naay local contacts ang grupo nga ania sa syudad ug karon maoy ilang gisubay.

Matud pa ni Santander nga tanang bangko ug tanang establisamento ang pwedeng mabiktima kung sila makita sa mga tulisan nga sayon tulison o kadtong mga “soft target.”

Sa nakalabay’ng semana, ang kapolisan mipasidaan sa tanang mga establisamento ug publiko nga magmabinantayon tungod sa nasigpatang miyembro sa mga robbery gangs dinhi sa dakbayan. (Uban sa reports nila ni Katherine R. Valdez ug Deana Rein S. Verbosidad, /EIM) (BANAT NEWS)