Motor midasmag sa kahoy 2 patay

CEBU, Philippines - Duha ang patay ug duha usab ang angol sa dihang ang motorsiklo nga ilang gisakyan nadasmag sa punoan sa kahoy didto sa national highway sa Barangay Pandacan, lungsod sa Pinamungajan niadtong Martes sa gabii.

Ang nakalas mao sila si Jose Iglesia, 19 ug si Roderick Gabiana, 16, pulos taga Pinamungajan.

Samtang ang duha ka angol mao sila si Kenneth Iglesia ug James Bonsobre, pulos taga Barangay Lamac sa maong lungsod.

Matud ni PO2 Marciano Suarez Jr., sa Pinamungajan Police Station nga nahinabi sa The Freeman igsuong pamantalaan sa Banat News nga si Jose maoy nagmaneho sa kolor pula nga XRM Honda nga nagtangag sa plakang GP-9193 ug sakay niini ang tulo niya ka mga ig-agaw.

 Nagpaingon sila sa dakbayan sa Toledo dihang sa pag-abot niini sa nahitaboan, milihay kini gikan sa motorsiklo ni Andres Tato, 45, nga taga barangay Butong, Pinamungahan nga mi-Uturn niadtong higayona.

Midugang si Suarez nga sa paglihay ni Jose sa sakyanan ni Tato, may laing sakyanan sa pikas direksyon nga nagpaingon usab kaniya busa iya usab kining gilikayan.

Apan gumikan sa iyang kakusog nga dagan nadasmag ang iyang sakyanan sa dakong punoan sa kahoy daplin sa karsada.

Ang ulo ni Jose ug ni Gabiana   maayong pagkaparok sa punoan sa kahoy nga maoy nakaingon sa ilang kamatayon, samtang sila si Kenneth ug Bonsobre nangalagpot ug mitugpa  sa sementadong karsada hinungdan nga pulos sila anaa sa talandugong kahimtang karon sa Vicente Sotto Memorial Medical Center sa dakbayan sa Sugbo.

Si Tato nagkagulkol na karon sa detention cell sa Pinamungajan Police Station samtang nagpaabot sa tukmang kaso nga isang-at batok kaniya. (BANAT NEWS)