P360 mil nasakiyo sa tulisan

CEBU, Philippines - Mokabat sa P360 mil kapin ang salapi nga nasakiyo sa upat ka wala hiilhing armadong mga lalaki nga mitulis sa duha ka mga establisemento   sa eskina sa mga dalan A. Soriano ug J. Briones sa barangay Looc, dakbayan sa Mandaue kagahapon sa alas 8:45 sa buntag.

Ang gitulis mao ang American Presudet Logistic ug APL Company Limited, dili kaayo layo gikan sa buhatan sa Mandaue City Police Office.

Si Chief Inspector Michael Anthony Bastes nga hepe sa Theft and Robbery Section (TRS) ug Inspector Ramil Morpos sa Investigation Detection and Management Bureau (IDMB) mibutyag nga ang traffic personnel sa Traffic Enforcement Agency of Mandaue (TEAM) nga nadistino sa maong dapit maoy nakapahibawo dayon sa MCPO kalabot sa maong tulis.

Nasayran nila ni Chief Inspector Bastes nga nag-ulhos-ulhos sa pagsulod sa compound ang upat ka mga lalaki nga pulos nagdala og folder ug nagpatuo nga mga kustomer ug gipangrikisa pa kini sa guwardiya nga si Genesis Maru kinsa maoy nagbantay sa gate sa maong mga establisemento nga nahimutang sa usa ka compound. Si Bastes miingon nga sa pagsulod sa ikaupat nga tulisan kalit lang gibunalan sa iyang armas de fuego ang ulo sa guwardiya.

Dayon giilog ang armas sa guwardiya ug gigapos kini kauban sa bodegiro nga si   Junrey Cuico. Unya ang maong mga ginapos gidala sa sulod sa opisina samtang gipanionan sa armas ang unom ka mga kawani didto sa sulod nga naglakip sa cashier nga si Marivee Aying ug ang manager nga si Erwin Viloria ug gipanghimulbolan silang tanan sa ilang mga cellphone ug salapi nga mokabat sa P10,000 ang tanan.

Matud pa ni Bastes nga human masakiyo ang kuwarta gikan sa kaha sa kahera nga nagkantidad og kapin P360 mil nanglayas dayon ang maong mga tulisan ug ang mga biktima maoy nakatawag dayon sa mga traffic enforcer sa maong lugar.

Ang mga polis   nga miresponde sa maong alarma wala na makaapas sa nanibat nga mga tulisan kinsa padayong gipangita karon sa mga otoridad. (BANAT NEWS)