Balay sa negosyante naugdaw

CEBU, Philippines - Moabot og P250 mil ang danyos sa pagkaugdaw sa panimalay nga gipanag-iya sa usa ka negosyante sa barangay Mangueiao lungsod sa Asturias niadtong Martes sa alas 12:30 sa udto.

Ang tag-iya sa naabo nga panimalay mao si Arsenio Trocio Comedia Jr., nagpuyo sa maong lugar ug negosyante og kahoy.

Matud ni PO3 Jordan Supatan sa Asturias Police Station dihang nahinabi sa Banat News ang sunog nagsugod sa kisame nga bahin sa panimalay.

Daling miresponde ang fire trucks sa lungsod ug gitabangan sa bombero sa Balamban, wala hinuoy naangol o nakalas sa maong hitabo.

Nasuta sa imbestigasyon nga electrical short circuit ang hinungdan sa sunog diha sa kisame.  (BANATNEWS)