Luigi nagpabilin sa One Cebu Party

CEBU, Philippines - Nagpabilin gihapon sa One Cebu Party si Kongresista Gabriel Luis “Luigi” Quisumbing sa ika-unom nga distrito sa lalawigan sa Sugbo.

Mao kini gibutyag ni Kongresista Pablo John Garcia sa ika-tulong distrito sa lalawigan sa Sugbo kinsa maoy secretary –general sa One Cebu Party nga gipangunahan ni Gobernador Gwendolyn Garcia.

Ang pagpatin-aw kalabot sa maong isyu gihimo ni Pablo John human mokatap ang mga huhungihong nga si Quisumbing mibalhin na kuno sa Liberal Party (LP).

Sa usa ka panagtagbo nga gihimo sa kadagkoan sa maong partido didto sa Kapitolyo sa miaging adlaw gibutyag ni Pablo John nga usa sa hinungdan sa pagpakatap sa mga tabi-tabi nga mibalhin sa LP si Quisumbing naggumikan kay usa kini ka magbabalaod sa nasud ug usa usab ka maayong tawo.

Si Quisumbing sa nasayran naningkamot nga ika-alagad niya sa hingpit ang tanang panginahanglan sa katawhan sa ika-unom nga distrito sa lalawigan.

Ang iyang serbisyo gipunting gikan sa edukasyon, panglawas, infrastraktura ug uban pa. Gipaabot usab niya nga maaprobahan sa pagkabalaod ang gisang-at niyang balaodnon bahin sa paghatag og espesyal nga voting center alang sa may apan sa panglawas ug mga senior citizen sa panahon sa election.

Ang maong lakang maoy tubag ni Quisumbing sa daghan kaayong mga mulo nga matud pa daghang mga disabled ug mga tiguwang nga dili na mamotar sa umaabot nga election tungod kay   kanunay silang maulahi sa pagboto kay gitipon ra man sa   usa ka voting center ang sama kanila ug sa mga normal og lawas nga mga botante.

Gumikan kay kasagaran kanila dili na kaagwanta nga magbarug gumikan sa kahuot ug kataas sa linya sa mga botante, mapugos nalang sila sa pagpauli nga dili makabotar. Gumikan sa ilang kalugda daghan kaayo sa maong matang   mga botante nakahukom nga dili na mag-apil-apil sa kalihokan sa election. (BANATNEWS)