Gidasmagan sa 'hit and run' angol

CEBU, Philippines - Kritikal ang kahimtang sa usa ka driver sa sikad -sikad kinsa nadasmagan sa usa ka hit and run nga sakyanan didto sa national highway sa barangay Poblacion, lungsod sa Ronda niadtong Domingo sa alas 9:00 sa gabii.

Ang biktima mao si Jovito M. Sumampong Sr, 59 , minyo, drayber sa sikad-sikad ug nagpuyo sa nahisgutang lugar.

Samtang ang nakadasmag kaniya mao ang Pajero nga kolor itom ug walay nakakuha sa plate   number .

Si PO2 Pepo Ansag, desk officer sa Ronda Police Station mibutyag sa Banat News nga nagpaabot og pasahero ang biktima sa maong higayon nga naglingkod sa giparking niyang sikad sikad daplin sa karsada.

Unya kalit lang milabay ang Pajero paingon sa siyudad sa Sugbo ug gidasmagan ang biktima.

Tungod sa kakusog sa maong pagkadasmag nalagpot ang biktima og pipila ka metros uban sa iyang sikad -sikad .

Samtang ang driver sa Pajero inay nga mohunong, mipasirit hinuon sa iyang sakyanan ug wa magtagad sa iyang nadasmagan.

Ang biktima gihatod dayon sa mga estambay ngadto sa Barili District Hospital.

Samtang ang mga polis nga miresponde sa maong alarma nakapunit sa side mirror sa Pajero nga nabuak-buak na.

Nakig-alayon sila karon sa mga kapolisan sa kasikbit nga mga lungsod aron madakpan ang hit and run nga driver. (BANATNEWS)