Tomboy nagselos naghikog angol

CEBU, Philippines - Gumikan sa selos misuway og hikog ang usa ka 26 anyos nga tomboy pinaagi sa pagpusil sa iyang kaugalingon didto sa dalan Sabellano, sa barangay Pardo, dakbayan sa Sugbo sa miaging Martes sa gabii.

Si SPO1 Redoble ug PO3 Velleza sa Pardo Police Station miila sa naghikog nga mao si Ruth Faye Rivera, nga nagpuyo sa nahisgutang lugar.

Matud pa ni SPO1 Redoble nga si Jonalyn Abelgas, 26, uyab ug live-in partner ni Rivera mibutyag kanila nga si Rivera kinsa nagselos kaniya, mihulga nga tapuson niini ang iyang kaugalingon pinaagi sa gition niyang armas sa iyang ulo,

Sa kabalaka niya, si Abelgas nagkanayon nga iyang gihangyo si Rivera nga dili ipadayon ang dautang laraw niini. Apan nakurat nalang siya dihang mipaka ang usa ka buto ug nahagba   si Rivera nga samdan ang tuong tampihak.

Si Abelgas nga wala motug-an sa hinungdan sa pagselos ni Rivera kaniya nagkanayon nga nakalitan siya sa hitabo busa misinggit siya ug nangayo og panabang sa iyang mga silingan kinsa mao usab ang nanawag sa buhatan sa kapolisan.

Sa pag-abot sa kapolisan sa maong lugar dali nga gihatod ang biktima ngadto sa Cebu City Medical Center.

Samtang didto sa dapit nga nahitaboan napunitan sa kapolisan ang usa ka . 38 kalibre nga revolver ug usa ka bala niini nga nalumping na. Padayon pang giimbistigar sa kapolisan ang maong hitabo. (/WC)  (BANATNEWS)