CEBU, Philippines - Ang Police Regional Office (PRO)7 nangandam alang sa posibleng pag-anhi sa Sugbo ni Ruben Ecleo, Jr., kinsa konbiktado sa kamatayon sa iyang asawa.
Gibutyag ni Chief Supt. Marcelo P. Garbo, Jr., ang hepe sa PRO7 sa Banat News nga iya na nga gimandoan ang mga sakop sa Intelligence Unit aron sa pagbantay sa palibot sa Sugbo.
Matud ni Garbo nga giampingan nila ang reputasyon sa ilang ahensya ug dili sila gusto nga may pinatyanay nga mahitabo dinhi sa Sugbo inig-anhi ni Ecleo.
Dugang pa ni Garbo nga padayon silang nangapkap og impormasyon bahin sa mga lihok ni Ecleo ug nakig-alayon na sila sa ilang national headquarters.
Dugang usab ni Garbo nga andam motabang ang ilang kaubanan sa nasud kung unsa may posibleng mahitabo dinhi sa dakbayan.
Sa laing bahin giila gihapon si Ecleo sa iyang mga sakop sa Philippine Benevolent Missionary Association (PBMA) nga ilang banggiitang lider.
Si Vicente Caballero, 69, minyo nga sakop sa PBMA nagkanayon nga andam silang mosuporta kang Ecleo bisan nakonbikto siya sa kasong pagpatay sa iyang asawa nga si Alona Bacolod Ecleo.
Apan wala siya masayud sa nahimutangan ni Ecleo karon, matud pa ni Caballero. - Deana Rein S. Verbosidad, NORSU ug Rey Pasaporte /WC (BANATNEWS)