Asawa gitusak og screw driver

CEBU, Philippines - Usa ka asawa kinsa buot untang makigbuwag sa iyang bana gitusak og dunggab pinaagi sa screw driver sulod sa usa ka lodging house sa dalan Colon, dakbayan sa Sugbo sa miaging Lunes sa gabii.

Ang biktima giila nga si Anarien Zafra, 35, empleyado sa Maxima Manpower Services nga taga Cabreros Street., barangay Basak – San Nicolas, dakbayan sa Sugbo, samtang ang suspek mao ang kaugalingon niyang bana nga si Rodolfo Joseph Zafra, 40, walay trabaho. Nasayran sa kapolisan gikan sa biktima nga mi-check-in sila sa Room M8, sa Hidden Lodge, nga nahimutang sa dalan Colon, dakbayan sa Sugbo kay nagsabot sila nga magbuwag.

Apan nasuko ang suspek ug giparok ang ulo sa biktima sa bongbong.

Ang biktima nga igo lang nalipong makadiyot miyuhot og dagan gawas sa lawak apan nakuptan sa suspek ang iyang liog dayon milanit kini sa screw driver nga may gitas-ong 5 pulgadas ug gitusak pagdunggab ang nagkalainlaing bahin sa lawas sa biktima.

Dihang nakita niyang mihutlay na ang iyang asawa, misinggit kini ug nagkanayon, “puslan mang di ka makigbalik kanako, mangamatay tang duha” dayon gitusak na usab sa mao gihapong screw driver ang iyang kaugalingong lawas.

Ang biktima kinsa may igo pang kusog sa lawas, migamit sa iyang tiil ug gisikaran ang suspek dayong dagan gawas sa lawak ug gisalbar siya sa room boy nga maoy mikuyog kaniya ngadto sa barangay hall sa Parian. - WC (BANATNEWS)