Tomboy gi-gang rape

CEBU, Philippines - Gidakop sa kapulisan ang usa ka tattoo artist human kini giila nga maoy usa sa upat nga gipasanginlang mi-gang rape sa usa ka tomboy kagahapon sa hapon diha sa barangay Sambag 2 ning dakbayan sa Sugbu.

Si Gleno, tinuod pangan ug apelyedo gipugngan sa Banat News nga nag-abang sa usa ka apartment diha sa Tormis Extension barangay Sambag 2 ang gidakop sa mga sakop sa City Intelligence Branch (CIB) sa Cebu City Police Office (CCPO)

Ang suspek hugtanong mihimakak sa iyang kalambigitan atol sa pagsukitsukit kaniya sa mga imbestigador sa CIB.

Si SPO2 Vincent Taladua, imbestigador sa CIB miingon nga ang biktima kansang pangalan gipugngan sa Banat News giingong gisignit ug gitionan og kutsilyo pasado alas-5 sa hapon diha sa Carbon Area niadtong Lunes. Siya gidala sa apartment sa Tormis Extension diin siya giingong gipulipulihan og lugos sa upat ka mga lalaki.

Kagahapon sa buntag nakahigayon og tawag   ang tomboy sa iyang hinigugmang babaye nga nagpuyo sa barangay Bulacao aron magpatabang, ang naulahi mao nay nangayo’g tabang sa mga sakop sa CIB.

Matud sa biktima ngadto sa kapulisan nga gipugos siya sa pagpainom sa mga suspek nga giingong maoy nakaingon nga nawad-an siya og panimuot dayon gitabangan siya sa paglugos sa upat ka mga suspetsado.

Sa dihang nakamata na siya kagahapon, matud sa biktima nga nag-inusara nalang siya sa kwarto sanglit ang mga suspetsado mibiya na.

Matud ni Taladua ang nadakpang suspek mag-atubang og kasong serious illegal detention ug pagpanglugos uban sa laing tulo niini ka mga kauban kinsa hangtud karun wala pa mailhi sa kapulisan.

Siya midugang nga si Gleno giila sa tag-iya sa apartment nga maoy usa sa upat ka mga lalaki nga midala sa biktima sa iyang apartment. - EIM (BANATNEWS)