Debating team sa UC nangandam

CEBU, Philippines - Nangandam na pag-ayo ang debating team sa University of Cebu (UC) sa umaabot nilang sangka sa debati batok sa taga Cebu Institute of Technology (CIT) karong Sabado didto sa Mandaue City Hall ground sa alas 6:00 sa gabii. Si Edison Rey Batiquin kinsa maoy leader sa UC debating team nagkanayon nga manghinaot sila nga atubangon na sila sa ilang kaatbang karong Sabado.

Kini human sila mapakyas sa miaging Domingo sa gabii dihang ang kaatbang nilang mga debatista sa Cebu Normal University , usa ray mitunga sa upat ka sakop sa team niini busa wala mahinayon ang maong lantugi.

Si Batiquin kinsa maoy Presidente sa Sugbuanong Kumentaristang Nagpakabana (SUKNA) mibutyag sa Banat News nga nabawo sila og paabot sa ilang kontra ug gibati sila og kapakyas tungod kay walay nakapasabot kanila sa hinungdan sa wala pagtumaw sa ilang kaatbang sa maong higayon.

Si Juril Patiño, ang Manager sa Bombo Radyo Philippines kinsa maoy nagpasiugda sa maong debati pinaagi sa ilang tulomanon “Lantugi sa Bombo Radyo” nagkanayon wala usab siya makadawat og mga pasabot gikan sa tagdumala sa CNU bahin sa kapakyas sa ilang team pagtunga sa maong debate.

Miingon siya nga ang tema nga lantugian tali sa debating team sa UC ug CIT karong Sabado mao ang “Angayan Bang Wagtangon ang Sangguniang Kabataan (SK)”. Sa maong tema, afirmatibo ang UC, samtang negatibo ang CIT nga  mogamit og Oxford Modified Format sa debati.

Miingon usab si Patiño nga aron dili kaayo molanat og dugay ang lantugi,   sagupon usab ang sistema nga 5 minute rebuttal ug 3 minute interpellation. Midugang si Patiño nga ipasagop sa maong debati ang lunlon Sinugboanon nga pinulongan aron mabaid pag-ayo ang mga batan-on paglitok sa kaugalingon natong pinulongan .

Gani miingon si Patiño nga may pipila ka mga eskuylahan nga iyang gidapit nga mosalmot sa maong tulomanon, apan mibalibad tungod kay ang ilang mga estudyante dili na kaantigo manulti og Binisaya. Ang lantugi karong Sabado may mga huwes nga maggikan sa pundok sa mga abogado, simbahan ug akademya.

May giandam usab nga mga ganti, diin ang una, ikaduha ug ikatulong mananaog atol sa final elimination makadawat og P5 mil, P3 mil ug P2 mil ang usa’g-usa. Samtang ang dili mananaog makadawat usab og mga consolation prizes uban usab sa mga tropeyo ug certificate of appreciation. (BANAT NEWS)