'Kawatan' Gipatay

CEBU, Philippines - Patay ang usa ka lalaking gipasanginlang responsable sa mga kawat alas-11 pasado ang takna sa miaging gabii sa usa ka panimalay nga nahimutang sa barangay Poblacion sa lungsod sa Cordova.

Ang namatay mao si Chritian Pitogo, 20, nga taga barangay Cogon sa nahisgotang lungsod kinsa gipusil sa wala pa mailhing mamumuno.

Si SPO1 Danny Alburo sa kapolisan sa maong lungsod nga nahinabi sa Banat News miingon nga si Ronillo Baguio nga security guard sa Cordova Central School maoy nakadiskubre sa patay’ng lawas sa biktima.

Dugang pa niya nga ang patay’ng lawas sa biktima napalgan nga nagbuy-od sa luyong bahin sa usa ka panimalay nga walay tawo tungod kay ang tag-iya atua man sa gawas sa nasud.

Matud pa ni Alburo nga ang guwardiya sa Cordova Central School maoy nakadungog sa mga buto sa armas. Si Baguio maoy nagpahibalo sa caretaker sa maong panimalay nga si Ronguilan Quirog nga nagpuyo sa maong dapit maoy nagtaho ngadto sa ilang buhatan labot sa dead person alarm sa maong lugar.

Dihang gihimo ang pakisusi ilang nasuta nga ang napusilan ug namatay nga si Pitogo ang naila na sa maong dapit nga kawatan sa maong dapit.

Dugang pa ni SPO1 Alburo nga ang namatay makadaghan na mabalhog sa bilanggoan sa ilang lungsod sa kaso gihapon nga pagpangawat ug magsulod gawas na lamang kini sa ilang bilanggoan sa kaso lang gihapon nga pagpangawat apan kanunay lamang makagawas kay dili man mopasaka og kaso ang mga biktima niini. - (BANAT NEWS)