Polis nadisgrasya sa motor kritikal

CEBU, Philippines - Kritikal ang kahimtang sa usa ka field trainee nga police human dasmagi ang gisakyan niyang motorsiklo sa gikasugat nga SUV Mitsubishi Montero didto sa national highway sa barangay Mainit lungsod sa Oslob niadtong Biyernes sa alas 8:00 sa buntag.

Ang biktima mao si PO1 Dante Denjiega, 23, ulitawo, field trainee police nga nadestino sa siyudad sa Carcar ug molupyo sa lungsod sa Samboan.

Samtang ang midasmag kaniyang SUV gimaneho ni Jeremias Tan, hingkod , nga taga Sibulan, Negros Oriental.

Si PO2 Ray Angelo Agustin sa Oslob Police Station mibutyag sa Banat News nga ang biktima gikan pa sa iyang duty sa Carcar ug paingon nang mopauli sa ilang lungsod dihang pag-abot sa maong lugar misuway siya og overtake sa gisundan nga Ceres bus.

Apan gikasugat niya ang SUV gikan sa Sibulan, Negros hinungdan nga gisantako siya sa simod sa maong sakyanan.

Tungod sa kakusog nalagpot ang biktima buwag sa iyang motor ug mitugpa siya sa batoon nga bahin sa daplin sa karsada hinungdan nga nangapangos ug nasamad ang iyang kalawasan.

Gihatud dayon siya ngadto sa Oslob District Hospital apan gibalhin sa tambalanan sa dakbayan sa Sugbo.

Samtang ang driver sa SUV mitahan dayon sa iyang kaugalingon sa kapolisan.(/WC)  (BANATNEWS)