6 dinamitero nadakpan

CEBU, Philippines - Unom ka mga mananagat ang gidakop ug nakuhaan og 60 ka kilong isda nga gituohang gigamitan og dinamita sa kadagatan sa Barangay Lipayran, sa Bantayan niadtong Biyernes.

Ang mga nadakpan sumala pa unang gisitar tungod kay napakyas pagpakita og mga dokumento sa ilang pagpanagat ug nadiskubrehan hinuong ang mga isdang ilang nakuha, pinaagi sa dinamita.

Ang kapolisan miila sa mga nadakpan mao sila si Rogelio Francisco, 40, igsuong si Arnold Francisco, 45, Hans Canama, 24, Virgilio Lepon, 44, Ramon Lascuña, 54, ug Rocky Gabucol, 27.

Si PO2 Lou Sevilla sa Bantayan Police Station mibutyag nga ang mga suspek luwan sa duha ka mga pumpboat dihang sila nadakpan niadtong Biyernes sa buntag sa grupo nila ni PO1 George Albuela ug PO1 Juram Desucatan kinsa nagpatrolya niadtong tungura.

Ang mga suspek nadakpan diha sa kadagatan sa Mambayacao Diot sa barangay Lipayran dihang wala sila makapakita og papeles sa ilang bangka, wala hinuon sila mosupak sa pagsikop kanila.

Ang representante sa Bureau of Fisheries and Aquatic Resources nga si Marlon Marande nga misusi sa maong mga isda nakadiskubreng gigamitan og dinamita ang maong mga isda maong nakuha.

Kasong kalapasan sa Akta Republika 8550 o Philippine Fisheries Code ang ipasaka sa unom. (BANATNEWS)