Rapist nga magmotor nakabiktima

CEBU, Philippines - Usa ka 12-anyos nga batang babaye nga gisignit sa usa ka wala mailhing lalaki gikan sa Banawa ang gibilin sa rapist diha sa may New Imus Road sa barangay Day-as ning dakbayan kagahapon sa kaadlawon.

Si Romeo Desto, tanod sa nahisgutang barangay mitug-an nga nahibulong sila dihang miduol sa ilang outpost ang usa ka 12-anyos nga dalagita kagahapon sa kaadlawon ug nangutana kung unsang dapita ang maong lugar.

Tungod niini ilahang gipangutana ang bata nganong naabot kini sa maong dapit sa maong mga oras, ang bata mitug-an nga siya gihunongan sa usa ka lalaking nagmotorsiklo diha sa may Good Shephered sa Banawa sa barangay Guadalupe ug gitionan og kutsilyo ug gimandoang pasakyon.

Matud sa bata nga gidala siya sa usa ka lugar diha sa barangay Mabolo ug giamong-amongan. Wala makatimaan ang bata sa klase sa motorsiklo sa rapist ug ingon man ang hitsura niini.

Human niini ang maong lalaki miingon nga ihatud siya og balik sa Banawa apan pag-abot sa usa ka punerarya sa New Imus Road gipakanaog siya ug gibiyaan sa maong lalaki.

Ang mga tanod mitawag sa Mobile Patrol Group ug dihang nahiagi ang motorcycle cops sa Special Weapons and Tactics (SWAT) ilang gidangop ang maong bata.

Ang bata giatiman na sa Department of Social Welfare Services (DSWS) samtang padayon pa ang kapolisan pagtumbok sa maong rapist. (BANATNEWS)