Rad Tech nangumot og dughan

CEBU, Philippines - Upat sa lima ka mga tinun-ang babaye sa kolehiyo sa pampulikong tunghaan sa habagatang bahin sa lalawigan sa Sugbu mireklamo batok sa usa ka Radiologist Technician (RadTech) tungod sa pagpanghikap niini sa ilang dughan dihang sila nagpa X-ray sa usa ka klinikang gitrabahoan niini sa dakbayan sa Carcar.

Ang lima ka biktima nagpangidaron og 19-anyos, upat niini nagpuyo sa usa sa mga barangay sa lungsod sa Argao samtang ang usa taga lungsod sa Moalboal midangop sa kapolisan sa miaging gabii sa kapulisan sa Carcar ug tungod sa tabang sa kapitan sa barangay Poblacion 3 ilang gireklamo si Rey Ong Ayoma.

Si Ayoma usa ka rad tech sa Binoya Clinic ug kasamtangan nag-abang diha sa sitio Dapdap sa barangay Poblacion 3 ug lumad nga taga Cagayan de Oro City. Si Merna, 42, tinuod pangan gipugngan nga nahinabi sa Banat News ug inahan sa 19-anyos nga tinun-ang graduating sa kursong Bachelor of Science In Industrial Technology (BSIT) mitug-an nga niadtong Huwebes sa hapon naghilak na kining mitubag sa tawag niya sa telepono ug gi-off ang cellphone niini.

“Gipahubo me tanan unya gihinol among tutoy, gihimas-himas sa technician,” matud pa sa inahan nga mikutlo sa giasoy kaniya sa iyang anak dihang nauli kini.

Samtang laing 42-anyos nga inahan sa 19-anyos nga tinun-an nga nahinabi sa Banat News nagkanayon nga nagkurog nga misumbong ang iyang anak sa mao gihapong gibuhat ni Ayoma.

Matud sa lima ka biktima nga tagsa-tagsa silang misulod sa x-ray room ug gimanduan silang pahuboon sa ilang blouse ug bra ug gikumot ang ilang dughan.

“Nahikapan niya kapin seguro sa napulo, kay lain pa kagahapon, iya pa gani ‘to giingnan ‘tong usa nga kagamay nimo og totoy uy,” nagkanayon ang mga tinun-an sa Banat News.

Si Kapitan Wilfredo Sabala sa Poblacion 3 sa interbyu sa Banat News nagkanayon nga iya gitabangan ang mga bata ug gidala niya sa kapulisan aron magpa-blotter.

Sa iyang bahin si Dr. Ardel Binoya ang tag-iya sa maong klinika nga nahinabi sa Banat News miingon nga niadtong higayona wala gyud siyay kalibotan nga naay ngil-ad nga buhaton sulod sa x-ray room si Ayoma sa ilang mga pasyente nga magpa x-ray.

“Gahapon naay ni-report nga gihikap ang totoy, kasagaran iyang buhatan ini nag-edad 16-17-anyos mga wala pay kalibotan ba,” sumala pa niya.

Matud pa ni Binoya nga iyang gikuyogan ang mga biktima ngadto sa barangay hall apan gitambagan kini nga adto sa kapulisan aron magpa-blotter ug gihatagan ang mga tinun-an og pamilite paingon sa police station.

Matud pa ni Binoya awtomatiko niyang gitangtang si Ayoma sa trabaho ug milayas na usab kini sa iyang giabangang lawak diha sa Poblacion 3 dihang gisusi sa mga opisyal sa barangay.

Kagahapon sa buntag gikuhaan og mga affidavit ang lima ka mga biktima sa Womens and Children Protection Desk (WCPD) sa Carcar City Police Station alang sa pagpasaka og tukmang kaso batok sa suspetsado.  (BANATNEWS)