Senior Citizens mohangyo balaod ipatuman

CEBU, Philippines - Ang mga kadagkoan sa senior citizens (SC) mohangyo sa kagamhanan sa nasud nga ipatumang hingpit ang balaod alang kanila.

Kini human hisayri nga ang maong balaod wala ipatumang hingpit   alang sa mga retirado og pangidarong    mga molupyo sa nasud.

Si Vic Sapio sa Consumers Right and Economic Welfare (CREW) Inc. maoy unang mibutyag kalabot sa kapakyas sa kagamhanan pagpatuman sa balaod nga nagprotiher sa SC busa wala kini kapahimusli sa maong sektor.

Ang Akta Republika 9994, ang balaod nga naghatag og mga benepisyo sa mga SC sama sa pagkagawasnon niini gikan sa pagbayad og value added tax (VAT) ug mga discount sa mga produkto ilabi na sa mga tambal wala kini tumana sa mga hingtungdang industriya.

Gibutyag ni Sapio nga pipila lang ka mga drugstore o botika dinhi sa probinsiya sa Sugbo ang mituman sa balaod ug mihatag og discount sa mga SC.

Si Sapio kinsa usa na ka senior citizen nagkanayon nga dili unta angayan sa mga hospital nga mangayo og deposito sa mga SC nga mahospital.

Ang senior citizen mao kadtong mga molupyo nga magpangidaron og 60-anyos pataas.

Busa alang kang Sapio nga mohimo sila og bug-at nga awhag ngadto sa kagamhanan aron nga ikapatumang higpit niini ang balaod pabor sa mga SC tungod kay silang mga magbabalaod mosangpot usab sa pagka-SC inig-abot nila sa tukmang edad. (BANATNEWS)