Dept. heads kinahanglang mananghid

CEBU, Philippines - Si Mayor Michael Rama mipadangat na og mga kamandoan sa mga department heads ug assistant department heads sa City Hall nga kinahanglan nga mangayo og pagtugot kaniya sa higayon nga imbitaron sila sa konseho.

Pipila na ka higayon nga gipatawag sa konseho ang ubang department heads alang sa usa ka executive session ug gipaesplikar sa pipila ka mga isyu.

Kahinumduman nga usa sa gipatawag kaniadto mao si Public Information Officer Carlo Dugaduga kung diin gituki pag-ayo sa ubang konsehal ang tinuoray niya nga function sa iyang puwesto partikular na ang pagdumala sa newsletter sa City Hall nga Bayanihan Advocates Rallying for Unity and Good Governance (Barugg).

Si Konsehal Alvin Dizon maoy usa sa mikwestyon sa Barugg gumikan sa alegasyong ang kasagaran sa unod niini naghisgot lang sa mga kalihokan sa mayor ug minos lang kaayo ang balita kalabot sa mga kalihukan sa mga konsehal.

Samtang si Bise Mayor Joy Augustus Young mipadayag nga wala na siya kasabot sa gibuhat sa mayor ug gihulagway niya kini nga “paranoid.”

Nagkanayon si Young nga maglisod pa siya og hatag og lawom nga komento niining bag-ong kamandoan sa mayor.

Apan ang kampo sa mayor mipadayag nga ang kamandoan niini gibase sa Local Government Code Section 455 kung diin naghulagway nga dunay responsebilidad ang usa ka local chief executive sa tanang kalihukan sa usa ka local government unit apan mopatigbabaw usab kini sa separasyon sa legislative ug executive department. (BANATNEWS)