Robbery gang nia sa Sugbu

CEBU, Philippines - Subling nag-alerto ang kapulisan dinhi sa dakbayan sa Sugbu nunot niining report nga dunay laing grupo sa tulisan nga mga ‘Tagalog speaking’ nga nasigpatan diha sa Colon Area niadtong milabay’ng Semana Santa.

Kining maong grupo lahi sa grupo ni Junjun Cabando nga unang gika-report nga sa miaging semana nga ania dinhi sa Sugbu sumala pa ni Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO).

Matud pa niini nga dili nila buot mahitabo dinhi ang nahitabong pagpanulis sa usa ka robbery gang sa usa ka dakong mall sa Metro Manila kapin usa ka semana na ang nakalabay.

“Mao nay nakuha natong info sa downtown area niadtong Biyernes Santo nga nasigpatan sila sa Colon Area nga mga tagalog speaking,” sumala pa ni Santander.

Matud ni Santander nga nakig-alayon na sila sa ubang mga unit sa kapolisan sa Metro Manila, Mindanao ug ingon man sa Bohol Provincial Police Office (BPPO) aron makakuha og impormasyon kabahin sa maong grupo.

“Naay gamay nga detalye nga gihatag sa atoa peru dili lang una nato i-divulge,” asoy pa niya.

Matud ni Santander kining maong grupo posibling moigo kini sa mga bangko, pawnshops, lending firm ug mga dagkong establisamento hinungdan nga ilaha nang gipahibawo ang mga tagdumala niini ug gihatagan nila og warning nga dili gyud mokompiyansa sa ilang seguridad sa ilang mga patigayon. (Rey B. Pasaporte/EIM)

Ecleo hukman karong adlawa

Karung adlawa gikatakdang hukman si Philippine Benevolent Divine Master ug Dinagat Cong. Ruben Ecleo Jr. human sa dul-an na duha ka dekadang pinaabot kalabot sa pagkamatay sa iyang asawa nga si Alona Bacolod.

Si RTC Branch 10 Judge Soliver Peras sa iyang bahin, mihangyo sa kapolisan nga adunay moalirong nga polis sa iyang sala aron makalikay sa mga posible unyang kagubot nga motumaw.

Tuod man, ang hepe sa kapolisan sa syudad sa Sugbo, Sr. Supt Melvin Buenafe mipasalig nga adunay mga polis nga ibutang sa Palace of Justice karong adlawa atol sa ipahigayong promulgation.

Samtang ang legal counsel sa kampo sa namatay’ng si Alona Bacolod, nga si Atty. Fritz Quiñanola mibutyag nga nanghinaot silang mapamatud-an sad-an si Ecleo.

Mipasabot usab si Quiñola nga nakasabot siyang nangayo pa og oras si Ecleo apan nagmalaumon sila nga motahan kini.

Samtang gipanawagan usab ni Quiñanola ang kapolisan nga unta masikop na si Ecleo nga adunay duha ka warrant of arrest nga nag-ungot kini tungod kay nakita ni Quiñola nga kun dili masikop si Ecleo daw usa kini ka dakong sagpa sa kapolisan.

“Aw magpresidente nalang, kun mao na nga dili madakpan,” pasabot pa ni Quiñanola nga nagtuong nia ra sa Pilipinas si Ecleo. (BANATNEWS)