CEBU, Philippines - Usa sa duha ka babayeng nalandig sa tambalanan kritikal human sila giingong gihiloan sa kauban nila sa trabaho kinsa nagkagulkol na karon sa prisohan.
Ang mga biktima mipasangil nga didto sila hiloi sulod sa ilang gipuy-an sa P. Del Rosario Extention sa barangay Sambag I ning dakbayan sa Sugbo.
Ang mga biktima giilang sila si Margarita Cimafranca, 53, minyo ug Dina Seraspe, 72, dalagang guwang, ug pulos mga sales agent/ ug real state broker kinsa kasamtangan nagpuyo sa Salvacion Apartment sa 36 P. del Rosario Extension.
Ang suspetsado giila sa kapolisan nga si Artemio Baluyos, 67, biyudo kinsa gisikop sa kapolisan ug gibalhug na karon sa prisohan.
Sa pasiunang imbestigasyon nga gihimo nila ni SPO1 Victor Ruel Ayuman, PO3 Lou Pagara ug PO2 Erwin Pequero sa Homicide Section sa Cebu City Police Office (CCPO) nasayran nga usa ka Petronilo Lompres, 68, kauban sa biktima ug suspek mitug-an nga sa alas-4:00 sa kaadlawon niadtong Martes, ang suspek miadto sa kusina sa 3rd floor ug iyang nakit-an nga may gilunod kining butang sa ‘takuri’.
Dugang niya nga ang suspek dihang nakabantay kaniya nanaog dayon sa silong.
Dugang pakisusi sa kapolisan nasuta nga ang biktimang si Cimafranca mitug-an nga sa alas-6:00 sa buntag misaka siya sa 3rd floor ug mikuha og init nga tubig sa ‘takuri’ ug iyang giagda si Seraspe sa pagpangape.
Apan dihang hapit na nila mahurot ang mug sa kape nagdungan pagsakit ang ilang tiyan ug pulos sila nalipong.
Si Cimafranca nagsuka samtang wala hinuon magsuka si Seraspe ug busa nangayo sila og panabang sa Emergency Rescue Unit Foundation (Eruf) kinsa mao nay midala kanilang duha ngadto sa Cebu City Medical Center (CCMC).
Nahibaw-an nga si Cimafranca giobserbahan sa mga doctor samtang kritikal ang kahimtang ni Seraspe.
Ang mga sakop sa Fuente Police Station 2 nga gipangulohan nila ni PO3 Achilles Sanchez ug PO2 Ledio Lebris daling miresponde sa maong alarma ug maoy midakop sa suspetsado kinsa hugot nga nanghimakak sa maong pasangil. Nakuha sa mga sakop sa Crime Scene Investigation Unit (CSIU) ang ‘takuri’ ug usa ka mug nga maoy gigamit sa duha ka biktima sa ilang pagpangape niadtong higayona.
Si Cimafranca misaysay sa kapolisan nga sa wala pa mahitabo, ang suspek misuway og bunal kaniya og martilyo ug gihulga siya niining patyon.
Si SPO1 Ayuman nga nahinabi sa Banat News nagkanayon nga pito na ka tuig nga nag-uban ang duha ka biktima ug suspek sa ilang trabaho.
Apan ilang nasayran nga halos tanang nagpuyo sa apartment pulos gikaaway sa suspetsado.
Midangop ang kapolisan sa buhatan sa National Bureau of Investigation (NBI)-7 aron magpatabang kay ang maong buhatan adunay igong kahimanan nga moila sa butang nga gisulod sa suspek sa ‘takuri. - BANAT NEWS