DUMAGUETE CITY, Philippines - Gikompirmar ni incumbent first district Congresswoman Jocelyn Limkaichong niadtong Martes nga modagan kini sa pagka-gobernador sa Negros Oriental sa 2013 local elections. Si Limkaichong sa pakighinabi sa mga tigbalita miingon nga buot niyang moserbisyo ug buot niyang ipatuman ang iyang mga programa sa distrito sa tibuok probinsya.
“After much reflection and consultation with my family, friends and fellow Liberal Party members I have decided that I will be seeking the position of Governor in the Province of Negros Oriental in 2013,” matud pang Limkaichong sa iyang Facebook account.
Giingong ang mamahimong running mate ni Limkaichong mao si Dr. Mark Macias, ang anak sa kanhi gobernador nga si anhing Governor Emilio Macias II.
Lakip sa giingong interesadong modagan sa pagkagobernador mao sila si kanhi Finance Secretary Gary Teves ug incumbent Governor Roel Degamo kinsa maoy mihulip sa pwesto ni anhing Gob. Agustin Perdices niadtong Enero 2011.
Si Teves sa iyang bahin mipahibalong ang iyang mamahimong running mate mao si incumbent Vice-Governor Jun Arnaiz ang igsuon ni Second District Congressman George Arnaiz. Si Degamo wala pay gihinganlang running mate.
Sa laing bahin, wala usab hinganli ni Limkaichong kung kinsay iyang palingkuron sa iyang distrito. - BANAT NEWS