Kap Mercado Apil sa grupo sa Radaza

CEBU, Philippines - Gitudlo si Lapulapu City Association of Barangay Captain President Leo Mercado nga usa sa ihulip sa duha pa ka bakanteng slot sa partido nila ni Lapulapu City Congressmen Arturo "Boy" Radaza ug asawang si Mayor Paz Radaza sa umaabot nga piniliay sa tuig 2013.

Kini ang gipadayag sa mga Radaza atol sa adlaw’ng natawhan ni Lapulapu City Mayor Paz Radaza kagahapon sa buntag atol usab sa pag-inagurar sa bag-ong ABC building sa dakbayan sa Lapulapu.

Matud pa sa mga Radaza sa pagpupos unya sa termino ni Mercado siya maoy buot nilang mohulip sa mabakante unyang pwesto nila ni Kon. Rudolfo Potot ug Kon. Cornelio Pahang sa konseho sa dakbayan sa Lapulapu nga mga last termers na.

Padayon pang nangita ang mga Radaza sa usa aron makompleto ang ilang lineup sa partido Deretso uban sa incumbent councilors, wala hinuon kini mokomento kun mokuha ba sila gikan sa oposisyon.

Si Mercado sa iyang bahin nagpasalamat sa pagsalig sa mga Radaza kaniya ug bisan pa man plano niyang mopahuway una sa politika ini og kapupos sa iyang termino dili siya makabalibad sa mga Radaza nga moserbisyo pag-usab sa mga Oponganons.  - BANAT NEWS