Biyudong nerbyoso naghikog

CEBU, Philippines - Patay nang napalgan ang 48 anyos nga biyudo nga nagbitay sa punoan sa mangga didto sa Sitio Kalanggaman, barangay Lutak, siyudad sa Naga sa miaging Lunes sa buntag.

Ang nagpakamatay nailhan nga si Arcadio Alferez, 48, biyudo ug nagpuyo sa maong dapit.

Si PO2 Gilmer Noval sa Naga City Police Station mibutyag sa Banat News nga   si Teodolo Montero, hingkod ug ugangan ni Alferez maoy unang nakadiskobri sa patay’ng lawas sa naulahi nga gahi na ug nagbitay sa punoan sa mangga kansang liog gilikosan sa pisi nga gigaid sa sanga sa mangga ang pikas tumoy niini.

Ang mangga nga gihikogan ni Alferez may gilay-ong 300 metros gikan sa iyang balay.

Sa imbistigasyon nga gihimo sa kapolisan ilang nasuta nga dugay nang nag-antos sa sakit nga nerbyos   si Alferez nga maoy gituohan nilang usa sa hinungdan sa paghikog niini.

Hinuon girekomendar sa kapolisan nga ipa-autopsy ang patay’ng lawas ni Alferez aron pagtino nga wala kini tuyoa sa pagpatay.  - BANAT NEWS