Road construction sa CSCR nakabalda sa trapiko

CEBU, Philippines - Daghang mga motorista ang mireklamo sa grabeng kahuot sa dagan sa trapiko kagahapon sayo sa buntag diha sa Cebu South Coastal Road sa habig sa dakbayan sa Sugbo tungod sa mga heavy equipment nga giparada diha sa tuong bahin paingon ngadto sa Malacañang sa Sugbo sa nahisgutang karsada.

Naobserbahan kagahapon nga diha dapit sa eskina paingon ngadto sa barangay Mambaling dunay pila ka heavy equipment nga nagparada diha daplin sa karsada ug pila ka metros ang distansiya laing mga heavy equipment usab ang gipangparada.

Gikan sa dakbayan sa Talisay kung anha moagi sa CSCR 10-minutos lang ang dagan apan sa maong sitwasyon miabot og 30-minutos ang biyahe una makagawas diha sa gate sa Malacañang sa Sugbo.

Kasagaran sa mga motorista nga magdali sa biyahe anha moagi sa CSCR aron makalikay sa bug-at nga trapiko sa dalan Natalio Bacalso apan nakugang sila sa kasinatian kagahapon diha sa CSCR sa SRP.

Pipila ka nagdaling motorista ang misuway og overtake apan pag-abot sa unahan nakadugang sila sa problema.

Ang executive director sa City Traffic Operations Management (Citom) nga si Rafael Yap nagkanayon nga nagpadayon ang Department of Public Works and Highways (DPWH) sa construction sa coastal road.

Matud pa ni Yap nga usa ra una ka lane ang pwedeng maagian apan nanawagan siya sa katawhan nga mas maayo mosayo sa pag-agi aron dili magkaproblema panahon sa rush hour. - BANAT NEWS