Pagkapriso ni Arsenio sa CPDRC susihon

CEBU, Philippines - Ipasusi ni Governor Gwendolyn Garcia kung unsa gayud ang responsibilidad sa Kapitolyo kalabot sa mayor sa Lezo, Aklan nga nabilanggo   karon sa Cebu Provincial Detention and Rehabilitation Center (CPDRC).

 Kini ang iyang gibutyag sa mga sakop sa media human siya sukita bahin sa iyang mga bag-ong direktiba karong nasuspenso na ang OIC warden sa nahisgutang pasilidad tungod sa maong mayor.

Matud pa sa gobernador nga iya nang gimandoan ang iyang mga abogado sa pagsusi kung angayan pa bang magpabilin sa CPDRC si kanhi mayor Alfredo Arsenio sa Lezo, Aklan.

Dugang pa niya nga ang pundo sa CPDRC alang lamang sa pinirisong taga probinsya sa Sugbo ug wala untay labot ang taga laing lalawigan niini.

Gani gipadayag sa gobernador nga gusto niyang ibalhin sa laing prisohan ang   kanhi mayor sa Aklan kay dako kaayo ang natampo niining kahasol   sa taga CPDRC.

Ang maong mayor gibalhin og priso dinhi sa Sugbo human balhina dinhi ang bista sa iyang kasong murder nga may labot sa pasangil nga nalambigit siya sa kamatayon ni Boy Hinulan usa ka magsisibya sa Bombo Radyo sa Aklan.  - BANAT NEWS