One Cebu dakong imposible - Martinez

CEBU, Philippines - Ang unification o kahiusahan sa One Cebu imposible, matud ni Bogo City Mayor Junnie Martinez.

Si Martinez nga maoy district chairman sa Liberal Party ug usa sa mga guest speakers sa gipahigayong 888 Forum kagahapon sa buntag diha sa Marco Polo Plaza Hotel sa barangay Lahug, dakbayan sa Sugbo miingon wala pa siya makakita nga mahitabo kini.

Kini tungod kay ang kasamtangang mga naa sa pwesto karon pulos adunay kaugalingong mga tinguha sa ilang karera sa politika.

“Imposible nang unification, number one: kinsa man ang mag-gobernador? Do you think that the Garcias will agree nga ihatag ang governorship sa Liberal Party? Or, the Liberal Party mosugot bang ihatag sa mga Garcia ang governorship?” pangutana pa sa usa sa labing beteranong politiko sa Sugbu.

“Mosugot ba ang mga Salimbangon nga mokampaniya sa Liberal Party? Ug kami mokampaniya ba usab mi sa pikas?” dugang pa ni Martinez. Matud niya ang problema sa maong sistema adto na sa tuig 2016 tungod kay kung kinsa ang makalingkod karong 2013 maoy lig-on sa 2016.

Gilakbit usab ni Martinez ang dakbayan sa Sugbo kun mosugot ba usab si Kongresista Tomas Osmeña nga makig-alyado (og balik) kang Mayor Michael Rama.

Gitawag ni Martinez nga usa ka “bomb trap” ang bisan unsa pang unification sa mga dagkong political parties dinhi sa Sugbu tungod kay ang nagpasiugda niini dili kaalyado sa LP.

Ang mga Garcia ubos sa kampo ni Bise Presidente Jejomar Binay ug kung mahinayon ang maong unification posibleng mawagtang ang LP sa 2016.

Apan si Martinez nagkanayon usab nga dili pa siya ganahang maghisgot unta og politika tungod kay ang proyekto sa iyang siyudad maoy gisentro karon sama sa katukoran sa city hall, bag-ong merkado, circumferential road ug pag-establisar sa Bogo City Science and Arts School.  - BANAT NEWS