Ambulansya vs pickup nurse patay

CEBU, Philippines - Patay ang usa ka nurse nga sakay sa usa ka ambulansya uban sa laing mga sakop sa medical team nga nagdala og pasyente dihang gidasmagan sa usa ka Toyota Hi-Lux pickup diha sa eskina sa MJ Cuenco Avenue ug J.Luna Avenue sa barangay Mabolo ning dakbayan kagahapon sa kaadlawon.

Ang namatay giilang si Trecie Jackson Abaño nga usa ka nurse nga nagbase na ngadto sa Singapore samtang luwas hinuon ang kaubang medical team niini nga sila si Milan Lester Nengasca; Mah See Choo Ng; Roy Jumao-as Benites ug Ronron Datucan.

Gitanggong sa kapolisan ang drayber sa pickup nga si Noel Anthony Logarta, 20, taga Mountain View sa barangay Quiot Pardo ning dakbayan.

Kinsa sumala pa sa imbestigador sa Traffic Division migawas sa liquor test nga positibong nakainom.

“Positive sa liquor test siya (driver) sa Toyota Hi-lux,” sumala pang PO2 Edgardo Becoy sa Banat News.

Sa imbestigasyon ni Becoy, ang ambulansya sa Chung Hua nga gimaneho ni Juan Cabigas Jr., 38, nagdala sa usa ka pasyente nga si Michael Rubio Jasmin nga dad-on unta sa Mactan-Cebu International Airport aron dad-on ngadto sa San Diego, California sa Amerika aron didto na kini patambalan.

Sumala pang Becoy sa pagtabok sa dalan J.Luna Avenue sa ambulansya kalit kining nadumbolan sa maong pickup nga sumala pa ni Becoy base sa pamahayag sa mga saksi kusog kaayong nagdagan.

Ang ambulansya naigo sa lubot nga bahin ug tungod sa kakusog sa pagkaigo niini natumba ang ambulansya ug nabalitok, samtang pwerteng gubaa sa atubangan ug driver side sa pickup ug nabanggaan ug gidaro pa ang kasugat nga Richielda Taxi nga gimaneho ni Ricardo Torcino.

Matud ni Becoy gikan sa I.T. Park sa barangay Apas paingon sa pier area si Logarta uban sa laing usa ka batan-ong lalaki.

Gituohan ni Becoy nga nabunal ang ulo sa nurse ug didto na nakabsan sa kinabuhi sa Chung Hua Hospital samtang gidala pagbalik ang pasyente. Sumala pa sa report sa TV Patrol Central Visayas nalagpot og pipila ka metros sa gawas sa ambulansya si Abaño.

Giandam na sa kapolisan ang kaso batok ni Logarta tungod kay mipadayag ang kabanay sa biktima nga mopasaka gyud og kaso.

Si Sylvan Jakosalem sa City Traffic Office Management mibutyag base sa police report nagwangwang ug nag-blinkers ang maong ambulansya. Mipasidaan kini sa mga motorista nga tahuron gyud ang mga emergency vehicles kun kini magwangwang.

Samtang usa ka sundalong sakop sa Central Command ang naangol human nibangga ang iyang gimanehong motorsiklo sa gikasugat nga taksi kagahapon sa alas-12:20 sa kaadlawon diha sa dalan F. Cabahug corner Almendras St. , sa barangay Kasambagan ning dakbayan sa Sugbu.

Ang biktima giilang si Elbrich Galarosa samtang ang nagmaneho sa taxi nga Carsam mao si Cornelio Alesna.

Human nalabay ang biktima sa iyang motorsiklo dali kining gitabang sa mga miresponding sakop sa Emergency Rescue Unit Foundation (Eruf) ug gidala sa tambalanan diha sa Centcom.

Matud ni Alesna nga iyang nakit-an ang biktima nga milihay sa gisundang motorsiklo ug nawad-an kini og kontrol ug didto malahos sa iyang taksi.  - BANAT NEWS