Oil exploration sa Alegria nagpadayon

CEBU, Philippines -  Gikalipay kaayo ni Alegria Mayor Emelita Guisadio ang kaugmaran sa pagsugod na sa oil exploration sa iyang lungsod.

Atol sa ekslusibong pakighinabi sa mga sakop sa media si Mayor Guisadio nagkanayon nga dugay nang gidamgo sa katawhan sa Alegria ubos sa iyang administrasyon ang maong oil exploration.

Iyang gitumbok   nga ang lokal nga kagamhanan sa Alegria mitabang sa China International Mining Petroleum Co. Limited, ang kompaniya nga maoy mopahigayon sa oil exploration, sa pagpahigayon sa ilang mga panginahanglan sa lungsod sama sa mga papeles ug uban pa sa tumong nga mapadali ang ilang operasyon.

Subay sa maong kalambuan gilauman ni Guisadio nga aduna gayuy commercial quantity sa lana sa ilang lungsod.

Matud pa niya nga dili lamang ang  kinitaan sa lungsod ug sa lalawigan ingon man sa nasud ang moumento, kundi labaw sa tanan ang panginabuhi sa taga Alegria tungod kay daghan naman unya ang makatrabaho   niini.

Gawas sa bukas nga trabaho alang sa mga molupyo sa lungsod, ang gagmay nga mga negosyante makapadayon usab sa ilang pamatigayon sama sa negosyante og pagkaon ug uban pang matang sa negosyo nga sarang mokita sa mga dapit nga may daghang tawo nga manarbaho.

Gumikan niini hayan nga moluag ang dagan sa ekonomiya sa maong dapit alang sa ikaayo sa tanan.  (BANATNEWS)