CEBU, Philippines - Gisaad ni Mayor Michael Rama nga hatagan niya og bag-ong mga Philippine flag ang mga nagkadaiyang pampublikong tunghaan dinhi sa Siyudad sa Sugbo.
Matud pa sa mayor kagahapon nga iyang nabantayan nga adunay mga tunghaan nga nag-antos sa bandera nga wala na magkadimao ang kolor tungod sa ka-daan ug nanglubad na .
Gawas nga nagkagidlay na, wala pa gyu’y klaro nga butanganan ang mga bandera nga angay gyud unta nga ibutang sa maayong puwesto, sumala pa sa mayor. Matud pa sa mayor nga kinahanglang presentabli ang mga flag sa matag tunghaan.
Gusto ni Mayor Rama nga ang mga center island sa mga kadalanan may mga bandera ilabi na ang dalan Osmeña Boulevard.
Gibutyag sa mayor nga gusto niya nga sa kasaulogan sa Independence Day karong Hunyo magbarug na ang mga bandera sa mga center island sa kadalanan ning dakbayan.
Opisyal usab niyang gipahibawo ang tanang kawani sa City Hall nga ang flag raising ceremony adto na ipahigayon sa Malacañang sa Sugbo ug dili na sa naandan nga Cebu City Hall.
Matud pa sa mayor nga angayan nga tabangan ang mga tunghaan ilabi na kadtong mga gision na og mga flag ug andam ang iyang buhatan sa paghatag og budget alang niini.
Sa pagkakaron iyang gipa-imbentaryo ang mga bandera sa nagkadaiyang tunghaan aron masuta kung pila ang gikinahanglang budget alang sa pagbag-o niini.
Matud pa sa mayor nga nakuha niya ang maong ideya sa higayon nga molarga siya ngadto sa laing nasud diin nasuta niya nga ibandera gyud niini ang flag sa ilang nasud nga sinaw ug nindot kaayo. (BANATNEWS)