Kasaulogan sa Semana Santa malinawon

CEBU, Philippines - Hapsay ug malinawon ang pag-obserbar sa dakbayan sa Sugbu sa taas nga bakasyon sa nakalabay’ng Semana Santa sumala pa ni Sr. Supt. Melvin Buenafe.

Matud ni Buenafe nga walay mga dagkong panghitabo nga nakabalda sa maong kalihokan nga kabahin sa Semana Santa ilabina niadtong Easter Sunday atol sa Sugat sa Pagkabanhaw ug niadtong Biyernes.

Gikalipay niya nga walay natala o na-report sa mga police station nga dunay gipangkuotan, gilabnihan sa mga tawo nga miduaw ug mibisita sa mga lugar nga adunay gipahigayon nga kalihokan sa Semana Santa.

Gidayeg usab ni Buenafe ang gipakitang performance sa iyang mga sakop nga seryosong nitutok sa mga simbahan nga gipahigayonan ang mga kalihukan sa Semana Santa.

Gikatahong nasigpatan dinhi sa Sugbu ang grupo sa mga tulisan nga kauban ni Jun Cabando ang gitumbok nga lider.

Apan si Buenafe sa iyang bahin mitataw nga ang grupo ni Cabando wala na diri sa Sugbu ug posibling milabay o miagi lang ang grupo dinhi sa dakbayan sa Sugbu.

Ang grupo giingong nasigpatan sa usa sa mga CCTV camera niadtong nagsingabot pa ang Semana Santa hinungdan nga gialerto ang kapolisan.

“Very efficient ang transportation dinhi sa Cebu posibleng niagi ra diri o sa reaction sa kapulisan nga dali kaayo, thru sa media nga maoy mi-dissiminate sa information nga atong gihatag..continue atong pagpaniid,” sumala pa ni Buenafe.

Matud pa niya nga magpadayon ang pagpatrolya sa mga sakop sa Motor Riding Unit (MRU) nga mga sakop sa Special Weapons and Tactics (SWAT) nga maoy gipaangayan niya sa mga motorsiklo nga gihatag ni Rama.

Sa unang kuwarter karung tuiga miabot na og 62 ka mga nagkalainlaing klase sa armas ang nasakmit sa kapulisan gikan sa mga sibilyan ug sa mga kriminal elements ug magpadayon ang higpit nga seguridad bisan natapos na ang Semana Santa. (BANATNEWS)