CEBU, Philippines - Patay diha -diha ang 21 anyos nga ulitawo human kini pusila sa duha ka tawo nga nagdumot kaniya didto sa bukirang bahin sa barangay Balaw sa lungsod sa Barili niadtong Domingo sa alas 4:30 sa hapon.
Ang biktima mao si Jonathan Torquedo, 21, ulitawo, nga taga barangay Masa, lungsod sa Dumanjug, samtang ang duha ka suspek mao sila si Ronnie Fat ug Dansoy Avila, pulos hingkod, nga taga barangay Bulak, sa mao gihapong lungsod
Si PO1 Richard Cababat, desk officer sa Barili Police Station mibutyag sa Banat News nga ang biktima gikan sa tabo sa barangay Balaw diin kini giingong nanghantak.
Apan dihang mipauli na kini sa ilang balay giatangan sa duha ka suspek sa iyang agianan ug didto gipusil siya sa makadaghang higayon hinungdan sa hinanali niyang kamatayon.
Gibiyaan sa mga kriminal ang biktima nga wala nay kinabuhi ug misirit kini pahilayo sa maong lugar.
Naabtan sa kapolisan ang biktima nga nagbuy-od sa yuta nga naglunang sa kaugalingon niining dugo.
Padayong gipangita sa kapolisan ang duha ka mga suspetsado kinsa giingong personal nga bangi ang hinungdan sa maong pagpamusil.
Walay nakitang timailhan ang kapolisan nga gitulis ang biktima busa nagtuo sila nga dumot ang hinungdan sa maong krimen.
Hinuon giandam na nila ang mga kasong ilang isang-at batok sa duha ka suspek. (BANATNEWS)