Bag-ong kumander sa NAVFORCEN nakigtagbo ni Gwen

CEBU, Philippines - Mihatag og kurtesiya   kang Governor Gwendolyn Garcia ang bag-ong commander sa Naval Forces Central Visayas (NAVFORCEN) nga si Commodore Roberto Santos ug mga kaubang opisyal sa miaging adlaw.

 Sa iyang pakighinabi sa gobernador, si Commodore Santos mipasalig nga iyang ihatag   ang iyang siyento porsento nga suporta sa mga kawsa sa gobernador ilabi na sa pakiggubat niini sa tanang matang sa illegal nga panagat dinhi sa Sugbo.

Matud pa niya nga sa iya unyang hingpit nga pag -asumer isip pangulo sa NAVFORCEN iyang ipadayon ang nasugdan nga mga programa sa iyang gipulihan nga si Commodore Zyril Carlos nga atua na karon sa AFP General Headquarters kay natudlo nga chairman sa Bids and Awards Committee.

 Gitumbok usab ni Commodore Santos nga ang pagka- relihiyoso sa mga Sugboanon maoy iyang inspirasyon sa pag-alagad dinhi sa Central Visayas.

Alang kaniya dako kaayo og mahimo ang pagkarelihiyoso sa tawo kay kaantigo kini mahadlok sa Ginoo.

Mao man gani nga kasagaran sa mga mananagat nga mahadlokon og Ginoo dili gyud mogamit og dinamita ug uban pang illegal nga matang sa panagat kay nasayud sila nga gidili kini sa balaod.

Kun supak sa balaod sa yuta nagpasabot nga supak  usab kana sa balaod sa Ginoo busa iyang gipaabot nga kadto mga dinamitiro mohunong na unta sa ilang illegal nga matang sa panagat aron dili sila magabaan. (BANAT NEWS)