Duha ka balay gikawatan

CEBU, Philippines - Dul-an sa P200 mil ang kantidad sa mga butang ug kwarta ang nadala sa kawatan gikan sa duha ka mga balay sa dakbayan sa Talisay.

Ang unang insidente nahitabo gabii niadtong Miyerkules diha sa sitio Kimba, barangay San Roque, dakbayan sa Talisay kinsa ang biktima giila sa kapolisan nga si Edwin Cabase, 42.

Nadala sa wala mailhing kawatan gikan sa balay ni Cabase ang usa ka HP laptop nga nagkantidad og P20,000, kwarta nga P20,000, nagkalain-laing power tools nagkantidad tanan og P25,000, amplifier, P7,000 ug DVD player, P7,000.

Sa imbestigasyon sa kapolisan ang kawatan miguba sa pultahan sa atubangan sa balay ni Cabase.

Ang ikaduhang insidente nahitabo kagahapon sa kaadlawon diha sa Plantor Apartment, Fortune Plain, Subdivision, barangay Cansojong, Talisay.

Ang biktima mao si Mary Ann Arpon, 28, ug duha ka suspetsado nga mao sila si Tukob Villeta, 20-anyos ug Gerry “Bukol” Ragudos, 20, mga residente usab sa nahisgutang barangay kinsa nadakpan sa hot-pursuit operation sa grupo ni SPO4 Daniel Tarucan.

Si Villeta ug Ragudos mihimakak sa mga pasangil.

Giingong nadala sa duha ang usa ka laptop, I-pod, usa ka cellular phone,video camera, pitakang may sulod nga mga identification card, duha ka ATM cards ug kwarta nga P800. (BANATNEWS)