Namatay sa heat stroke

CEBU, Philippines - Patay nang nakit-an sa mga silingan ug kabanay ang 83 anyos nga lola nga na-heat stroke ug nagbuy-od sa kakahoyan didto sa barangay Dawis Norte sa lungsod sa Carmen niadtong Lunes sa buntag.

 Ang napalgang patay na mao si Sofia Bentoy Escoton, 83, biyuda, nga nagpuyo sa maong lugar.

Si SPO2 Simplicio Gibo, desk officer sa Carmen Police Station mibutyag sa Banat News ang maong lola milakaw sa alas 10:00 sa buntag niadtong Domingo kay manguha og kahoy nga isugnod apan wala na gyud kini mahiuli hinungdan nga ila kining gipangita.

Nianang pagka- Lunes sa alas 6:30 sa buntag mao nalay nakit-an sa iyang mga silingan ug kabanay nga patay na nga nagbuy-od sa kakahoyan mga 400 metros gikan sa balay niini.

Ang municipal health officer nga si Dr. Elmer Batao maoy mikonpirmar nga patay na ang maong lola ug gituohan nga na-heat stroke kini.

Kini human usab ang mga kabanay mitug-an nga ang maong lola adunay sakit nga high blood.  - BANAT NEWS