2 gipamusil patay

CEBU, Philippines - Duha ang patay sa sunodsunod nga kaso sa pagpamusil sa managlahing lugar dinhi sa lalawigan sa Sugbo kagahapon sa kaadlawon.

Ang unang insidente nahitabo sa sitio Tabok sa barangay Maslog siyudad sa Danao, alas 2:00 kagahapon sa kaadlawon diin ang biktima usa ka Ramil Macalolooy Papan, 38, nagpuyo sa maong lugar.

Samtang ang duha ka mga responsable sa pagpatay giingong nagsakay og motorsiklo nga Honda XRM nga walay plate number.

Matud ni PO1 Wendell Jay Baritua sa Danao City Police Station dihang nahinabi sa Banat News paingong mopalit sa tindahan ang biktima apan sa iyang paglabang sa karsada kalit kining gipusil sa mga lalaking nagsakay og motor.

Ang biktima naigo sa walang bahin sa ilok, bukobuko, walang bukton ug apapangig ug namatay diha-diha.

Ang kapulisan padayun pang nag-imbestigar pag-ila sa mga gikatahapan ug gisuta pa nila ang motibo sa krimen.

Samtang sayo niini, laing kaso sa pagpamusil ang nahitabo sa barangay Abugon sa lungsod sa Sibonga diin usa ka factory worker ang gipusil patay alas 12:30 sa kaadlawon.

Ang biktima nga namatay sa tambalanan mao si Isabelito Saraum Jr., 23, nagpuyo sa maong lugar, usa ka Ricky Rama, 23, nga estambay ug nagpuyo usab sa maong dapit maoy gitumbok nga mamumuno.

Matud ni PO1 Jose Palmero sa Sibonga Police Station dihang nahinabi sa Banat News nagmaneho sa iyang motorsiklo ang biktima paingon nang mopauli dihang kalit gibabagan sa suspek ug mipahunong sa biktima.

Uwahi na alang sa biktima ang paglikay dihang kalit kining gipusil sa ulo ug natagak sa motor. Ang suspek daling miikyas ug wala na maabti sa nirespondi nga mga polis.

Personal nga dumot ang motibo sa krimen sanglit gihulagway sa mga silingan nga dugay nang walay maayong relasyon ang biktima ug suspek. (BANAT NEWS)