Bata kansang litrato gi-upload sa porn site tabangan

CEBU, Philippines - Gipasaligan sa kadagkoan sa Police Regional Office-7 ang inahan sa 14-anyos kansang hubo nga mga litrato napatik sa usa ka porn site, ang inahan midangop dinhi sa Banat News aron magpatabang sa maong problema.

Si Sr. Supt. Louie Oppus, Deputy Regional Director for Operation (DRDO) sa PRO-7 mibutyag nga ilang sutaon kun unsa gyud ang tinuod nga nahitabo sa 14-anyos.

Matud ni Oppus nga magpakitabang sila sa Criminal Investigation and Detection Group (CIDG) Cyber Crime Unit nga dunay igong kahimanan aron matumbok ang address sa email sa nag-upload sa maong porn site.

Nabalaka si Oppus nga posibleng ang ubang mga litrato sa maong porn site taga dinhi ra sa dakbayan sa Sugbu ug Metro Cebu.

Ang 14-anyos kinsa 13-anyos pa atol sa pagkahitabo matud pa sa inahan dihang midangop kini dinhi sa Banat News nga gipasuyop og shabu ang iyang anak sa usa ka bayot nga mi-recruit sa bata ug midala niini sa hotel.

Human sa pagsuyop sa ilegal nga drugas gikuhaan dayon kini og mga litrato uban sa pasalig nga bayran kini og P4mil ug dili kini i-upload sa internet. Apan sa nakalabay’ng bulan nabangalan sa inahan ang maong litrato dihang dunay mga polis nga mipakita niini kaniya.

Kagahapon sa alas-10 pasado sa buntag ang inahan ug anak mibalik sa PRO-7 sa buhatan ni Oppus apan sa dihang gikuhaan sa mga cameraman nakabantay ang bata ug wala na kini molahos pagsaka tungod sa kahadlok.

Ang inahan ra maoy milahos pagsaka ug gitawagan nalang sa telepono ang iyang anak ug gipaestorya kang Oppus.

“ Usa lang ka butang gusto sa bata ug inahan nga mapapas o mawala sa website (ang mga litrato),” nagkanayon si Oppus human niya gikaestorya ang bata sa cellphone.

Gusto sa inahan nga mataral sa hukmanan ang bayot nga maoy nag-recruit sa iyang anak ug nag-upload sa litrato diha sa porn site. (BANAT NEWS)